Þakklætisskrif
Viltu auka hamingju þína um 25%? Svarið við þeirri spurning er eflaust, já! Hver vill það ekki? Áður en við skoðum eitt af því sem opnar dyrnar að hamingjunni ætlum við aðeins að skoða hugtakið hamingja. Leitin að hamingjunni er líklega jafn gömul mannkyninu. Hamingja er metin mikilvægasti þátturinn hvað varðar lífsgæði. En er hamingjan ekki bara eitthvað sem við finnum á eigin skinni og þarfnast ekki útskýringar? Nei, svo er aldeilis ekki því það er bæði hægt að skilgreina og mæla hamingjuna og það er eitt af því sem er rannsakað með vísindalegum hætti undir formerkjum jákvæðrar sálfræði. Viðfangsefni jákvæðrar sálfræði er m.a. hvað gerir lífið þess virði að lifa því og hvað stuðlar að því að einstaklingar, hópar og stofnanir séu vel starfhæf og blómstri. Hamingjan er ekki bara fyrir útvalda. Hamingjan hefur m.a. verið skilgreind þannig að hún sé upplifun okkar á því hvernig við metum líf okkar þegar á heildina er litið.
Hamingja er meðvitað hugarástand og við höfum heilmikið um það að segja hvort við erum hamingjusöm eða ekki. Hugarfarið skiptir sköpum og það að temja sér jákvætt hugarfar er algjört lykilatriði. Hamingjuna er ekki að finna þegar þú loksins nærð einhverjum áföngum í lífinu, heldur er galdurinn að finna hamingjuna á hverjum degi í ófullkomleikanum. Þú getur valið að standa hnarreist í miðjum stormi með jákvæðnina að vopni eða lúta í lægra haldi og láta storminn ná tökum á þér. Á einfaldara máli þýðir þetta að ef við ætlum að bíða eftir því að hamingjan komi til okkar, gætum við þurft að bíða ansi lengi. En hvernig förum við að því að standa storminn af okkur? Svarið felst m.a. í þakklætinu.
Þakklæti er ein sterkasta og jákvæðasta tilfinning sem til er. Þakklæti hefur verið ofarlega á baugi hjá siðfræðingum en sálfræðingar hafa ekki veitt því mikinn gaum fyrr en nýlega og það hefur verið rannsakað töluvert síðastliðin ár. Robert A. Emmons prófessor í sálfræði við University of California er þar fremstur í flokki. Rannsóknir hans hafa m.a. tengt þakklæti við aukna hamingju og ein rannsókn sem birtist í The journal of social and clinical psychology hefur sýnt fram á að þakklæti getur haft mestu tengsl við andlega heilsu og hamingju af öllum þeim persónulegu einkennum sem þekkt eru. Emmons gerði m.a. rannsókn á því hvaða áhrif það hefði á vellíðan okkar að skrifa í þakklætisdagbók. Eftir aðeins þriggja vikna skrif í þakklætisdagbók þar sem þátttakendur skrifuðu niður þrjá hluti sem þeir voru þakklátir fyrir á hverjum degi jókst hamingja þeirra um heil 25%.
Reglulega skrif í þakklætisdagbók geta haft í för með sér betri svefn, aukna vellíðan, sterkara ónæmiskerfi, meiri orku og minni streitu svo fátt eitt sé nefnt. Þeir sem iðka þakklæti hugsa ekki um það sem vantar í líf þeirra heldur þakka fyrir það sem þeir hafa eða eins og skáldið Hamlet orðaði það “There is nothing either good or bad but thinking makes it so”. Mergur málsins er að við erum okkar eigin lyklasmiðir og það er í okkar höndum að nota réttu lyklana til að opna dyrnar að hamingjunni því hana er svo sannarlega að finna ef við veljum að líta á björtu hliðar lífsins og vera þakklát fyrir það sem við höfum.
Takk
